Google

Tuesday, January 15, 2008

وحــــــدوووووووووه

إخوانى المدونين
أخواتى المدونات
بيان هام
حياتنا دى عبارة عن لحظات بنعيشها
لحظات حلوة ولحظات مرة , لحظات سعادة ولحظات ألم , لحظات نجاح ولحظات فشل ,لحظات لقاء ولحظات فراق
ولحظة مع لحظة = ساعة
وساعة مع ساعة = يوم
ويوم مع يوم = سنة
معلومات قيمة جدا أنا عارفة ;)
ندخل فى الموضوع بقى
عمرنا ده كلو عبارة عن شوية لحظات وأيام وسنين فوق بعض
وراكو وراكو متحاولوش
الأيام بقى فيه منها :
أيام عادية بتعدى علينا من غير حتى ما نحس ولا ناخد بالنا انها عدت
وأيام مصيرية بتمثل لنا حاجة مهمة مينفعش ننساها ولا نمر عليها مرور الكرام
والنهردة كاااااااام
انهردة 15 يناير
احفظوا التاريخ ده كويس حسألكو فيه بعد شوية
اششششششمعنى
لأنو أهم يوم فى تاريخ البشرية القديم والمعاصر وأهم يوم فى حياتى أنا شخصيا
لييييييييييييييه
علشان فى نفس ذات اليوم ده من كام سنة طلعت أنا للدنيا اللى تشرح القلب دى
أينعم هما جابونى غصب عنى لأنى مكانش ليا مزاج وكنت حالفة ميت يمين إنى مش جاية هنا نوهاااااائى
بس يلا , بعد العديد من المفاوضات والتسويات والتنازلات والاتفاقيات قررت إنى أتنازل واطلع للدنيا بقى وخلاص ,
وكلو يهون علشان مصر


ايه اللى أنا بقولو ده ههههههههههههههه
طيب طيب متزوقوش كدة
افهمونى بس
أنا بتكلم جد والله
حوضحلكو اللى بقولو ما احنا اخوات بردو مفهاش حاجة

الحكاية بقى إن مامتشى حبيبتشى وهى صغيرة كان عندها فى البيت كم قطة فتقريبا موضوع القطط ده أثر عليها , وسبحان الله كانت كل ما تحمل مبيكونش فيه نصيب والحمل مكانش بيكتمل
ست مرات الحمل ميكتملش
خدو بالكو بقى م الحتة اللى جاية دى
أنا الوحيدة
الوحيييييييييدة من ضمن الست مرات دول اللى الحمد لله الموضوع مشى للآخر وجيت..
شايفين النحس
شايفين الغلاسة
يعنى أنا بس اللى ليا نصيب أشوف الدنيا من ضمن اخواتى اللى كان مفروض يبقوا خمسة
عاااااااااااا

أوقات بقعد أفكر خاصة لما الدنيا بتضيق عليا وأقول :
اشمعنى أنا اللى جيت من ضمن اخواتى؟
ياترى ده خير ليا ولا ايه؟
هما مرتاحين ملهمش نصيب يآسوا فى الدنيا زى ما أنا بآسى , بقعد أحقد عليهم شوية
بس بعدين برجع بقول الحمد لله إنهم ارتاحوا ,
أنا بحبهم أوى برغم إنى مشفتهمش
ومعرفش كمان كانو حيبقو كام بنت ولا كام ولد

فهمتوا بقى الفلم؟
الفلم من الآخر إن انهردة عيد ميلادى
الكااااااااام بقى؟
ال 23
ياااااااااااااه 23 سنة مرت من عمرى وأنا مش دريانة
يلهوى , حاجة تخض بجد
أنا مش بحب أكبر وبترعب من فكرة إن العمر يجرى بيا كدة وأنا مش عارفة أمسكه أو أوقفه
على فكرة , أنا من الناس اللى مش بيحبوا يحتفلوا بعيد ميلادهم لسبب بسيط أوى
لأن العمر ده عامل زى النتيجة المتعلقة عالحيط
يا سلام يا سلام شايفين التشبيهات , تكونش دى اللى اسمها الإستعارة المستكنية اللى خدناها فى النحو زمان
ما علينا
العمر ده عامل زى النتيجة , كل يوم بيعدى بنقطع ورقتو ونرميها لحد ما يخلص كل الورق اللى فيها نقوم نرميها هى كمان
فيوم عيد ميلادى بقى بكون غلسة غلاسة
وكآبة الدنيا فيا وتلاقونى كدة قاعدة وحاطة إيدى على خدى كأنى قاعدة فى ميتم باخد العزا
أصحابى كمان هههههههههههه والله بيصعبوا عليا
هما كمان عارفين الحكاية دى عشان كدة بيبقوا خايفين وهم بيتصلوا بيا عشان يقولولى كل سنة وانتى طيبة
فبيكتفوا فى اليوم ده انهم يبعتو مسجات عالموبايل وايميلات وبس
أصل اللى يقللى كل سنة وانتى طيبة فى يوم زى ده ببهدلوا
مش أنا اللى يتقاللى كل سنة وانتى طيبة
فبيستنوا عليا يومين ولا حاجة عشان أكون تعايشت مع الواقع الأليم وتقبلت الصدمة بصدر رحب
وصدقت إنى فعلا كبرت سنة وبعدين يكلمونى
=================================
يا معشر المدونين والمدونات
أنا بجد مبسوطة أوى إن ده أول عيد ميلاد ليا عالبلوج , ومبسوطة إنى بقيت فى وسطيكو وبقيت واحدة من المجتمع التدوينى الجميل ده , وبجد بحبكو فى الله أوى وحاسة إنكو إخواتى اللى ممكن افضفض معاهم وأشكيلهم وأشاركهم ويشاركونى لحظات عمرى سواء حلوة أو وحشة

طولت عليكو أوى ونسيت أضايفكو
لأ لأ لأ متفرحوش أوى كدة
أنا مش بتاعة تورتة وجاتوه وكلام فاضى من ده
حقوم أعملكو القهوة السادة على روح المرحوم

اللى حيجى من غير هدية يا ويلو
أنا بقلكو أهو هههههههههههه
كل سنة وانتو معايا
فى حاجة مهمة نسيت أقولها
وحدووووووووووووووووه

43 comments:

dr.Roufy said...

غالية حبيبتي
كل سنة وانتي غالية ..
كل سنة وني مدوناية ..اموراية :)
كل سنة وانتي فرحانة
ويارب السنة الجاية نكون فرحنا فيكي بقى
:))
قصدي بيكي
هههههههههههه
وطبع شهر يناير دا شهر العظماء
أكيد يعني
بما ان عيد ميلادي بعدك بحداشر يوم
وبرضه في يناير
:)
كل سنة وانتي طيبة ياقمر
:*
والهدية سبتها مع الأمن تحت
;)

dr.Roufy said...

على فكرة..انتي عسل
ههههههههههههههه
البوست تحفة
ومن باب الأخوة وبما انك مابتحبيش كلمة كل سنة وانتي طيبة
هاقول لك
*
*



















كل سنة وانتي طيبة تاااااااااني
:p

ali said...

Happy birth day
بلا ش كل سنة وانت طيبة
عشان متزعليش
بس ليه التشاؤم ده ده انتى لسه صغيرة امال لما يبقى عندك 30 سنة زى خيخة هتعملى ايه
هو صحيح الانسان لما بيتولد بيصغر ولا بيكبر
على فكرة ده سؤال جامد جدا حاولى تجاوبينى عليه فى ردك على التعليق
على فكرة دى اول زيارة لمدونتك
مدونتك جميلة
وكل سنة وانتى طيبة

فرنسا هانم said...

لاحول ولا قوه الا بالله
اللهم انا لانسألك رد القضاء ولكن نسألك اللطف فيه
بمزيد من الحزن والاسى
وبعد كام شفطه من القهوه الساده
نتقدم بالنيابه عن اهل السويس
بالتعزيه فى عيد ميلاد ابو الفصاد
ايه يا جميل ده ؟؟؟؟؟
؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟
؟؟؟؟؟؟؟؟؟
عزمانى
وهاتى عبايه سوداء
واشربى قهوه ساده
والاقيه عيد ميلاد
كركبتى بطنى
حرام عليكى
على العموم
انا مش هاقول كل سنه وانتى طيبه علشان متزعليش منى
وعلشان كده
هاقول
كل سنه وانتى طيبه

صاحب المضيفة said...

كل سنة وانتي طيبة ويارب تكون دايما في طاعة وهنا

وبعدين نفس يوم ميلاد خيخة برضو

يارب يجعل أيامكم كلها طاعة وهنا وسعادة

دمت بخير

الـسـيـدة نـون said...

عيد ميلادك
النهاااااااااااااردة عيد ميلادك انتى كمان
وزعلانة
زعلانة ليه يا بت
زعلانة على سنة عشتيها بحلوها ومرها
زعلانة على سنة جديدة جاية عليكى خديها فى حضنك واسرقى منها كل اللحظات الحلوة اللى شايلاهالك
ولو فى لحظات سودا خديها برضه بس ارميها فى الزبالة
لكن ماتزعليش ولا تحطى ايدك على خدك
انا بقى على عكسك خالص
بحب يوم عيد ميلادى واحب الناس تتصل بيا وتكون فكرانى
وبحب الهدايا وبحب التورتة وبحب منظر الشموع وهى بتكتر كل سنة شمعاية زيادة
ليه يا غالية كدة
يابت ده انتى لسه صغنونة ماشفتيش حاجات كتير تخليكى متعقدة كدة
قومى يا بت بلاش هم وروحى كلى حتة تورتة من اللى اكيد مامتك جايبهالك
روحى افرحى والعبى وفرقعى بلالين
عيشى طفولتك اللى مستخبية جواكى
متخليش حد يقنعك انك كبرتى
عارفة هانى عمال يقولى خلاص بقيتى عجوزة
وانا اقوله بعينك
مهماكبرت فى عمرى هافضل بقلبى ومن جوايا صغنونة
وعمرك ماهتقنعنى انى كبرت
انا لسة عيلة
صدق اللى قال الشباب شباب القلب
اقولك على حاجة بس ماتضحكيش عليا
انا مش مصدقة ان انا عندى تلاتين سنة بصراحة اكتر من سبعتاشر سنة مش هاقتنع
حاسة ان انا لسة بنوتة
بنسى خالص حكاية سنى دى
لكن مش معنى كدة انى بتبرى من عمرى او بنكر سنى لو حد سالنى
ل تلاقينى بقول بمنتهى البجاحة ايوة انا عندى تلاتين سنة
اصل ده عمر عشته هنكره ليه

قومى يا غالية
اسمعى اغنية حلوة وهيصى
وكلى تورتة
قومى يابت بلاش كسل
دى اللحظة الحلوة ماتتعوضش
وانتى اكيد لحظة ميلادك كانت حلوة وغالية
قومى يا بت يلا
واحب اهديلك اغنية مصطفى كامل
كل سنة سنة سنة وانت طيب يا غالى
كل سنة وانت طيبة يا اغلى غالية

اختك الكبيرة
خيخة

صالح سعيد said...

كان نفسى ابقى اول واحد يقوللك كل سنه وانتى طيبه يا غاليه
يا صاحبة الاسم الجميل
يا رب تحققى كل امنياتك فى العام الجديد وكل سنه وانتى طيبه وعقبال 100سنه ونبقى نحتفل بعيد ميلادك فى دار المسنين
ارق تحيه

Ahmad Hegab said...

كل يوم و انتى طيبة

ذو النون المصري said...

كل سنه و انتي طيبه
انا كمان مبحبش ابدا يوم عيد ميلادي
كا ما احس اني كبرت سنه مش برتاح
كل سنه و انتي طيبه كمان مره
و عقبال منهني في المدونه خمسين مره او اكتر

ذو النون المصري said...

hgl,sdrd uk]; vhzui []h
الموسيقي عندك رائعه جدا

truelove said...

اه دلوقتي عرفت بقى اسمك غالية ليه علشان جيتي بعد شوقة زي مابيقولوا كده كل سنة وانت طيبة كل سنة وانتي محققة كل امانيكي كل سنة وانتي سبب في سعادة قلب ماما تحياتي ياغالية على فكرة انا ضفتك من فترة على الميل على الجميل

Anonymous said...

حازم ربيع
----------

برغم انى منقطع عن التدوين

وسايب مسئولية المدونة للشاعرة والكاتبة الصديقة درة الحسن

وبرغم انى بتابع عن بعد

الا ان دا مش ها يمنعنى ابدا
انى ااقولك ياغالية

كل سنة وانتى فى احسن صحة
واحسن حال
كل سنة وانتى راضية ربنا
كل سنة وانتى فى تقدم روحى وثقافى وعلمى

واسال الله لك

ان يرزقك اعمالا تبلغك جنة الخلد
وان يأتيك فى الدنيا حسنة
وفى الاخرة حسنة

واوعى تزعلى انك بتكبرى

الانسان كل ما بيكبر بيزداد
نضوج

Anonymous said...

الغاليه الجميله

كل سنه و انتي بخير و بصحه و محققه كل اللي نفسك فيه يارب دايما

معلش ياقمر جيت متأخره سامحيني بس بتمني ان السنه دي تكون سنه خير ليكي و تحققي فيها كل حاجه نفسك فيها

ربنا يسعد قلبك ياقمر

تحياتي

ღϠ₡ღأمير الهدوءღϠ₡ღ said...

كل مره أجي متأخر كده
يعني لو مش جيت مش كنت أعرف أحضر الإحتفال

ههههههههههههههههه
بس بجد انا ضحكت كتير
طريقتك في الكلام روعه روعه

ههههههههههههههههههه
هههههههههههههههههههه
هههههههههههههههههههه

معلومات قيمة جدا أنا عارفة ;)
يا سلام يا سلام شايفين التشبيهات , تكونش دى اللى اسمها الإستعارة المستكنية اللى خدناها فى النحو زمان
ما علينا

هههههههههههههههههههههههههههه
هههههههههههههه

المهم
النهارده 16

يعني ممكن أقول
كل سنه وإنتي طيبه
وفي هدايا في مدونتي
منتظر زيارتك
وكل سنه وإنتي طيبه مره تانيه
وبجد كلامك فيه معاني كتيييييييره
اثرت فيه

تحياتي
:)

البِـئرُ والظمّأْ said...

حبيبة قلبي غاليه



ههههههه
سيبك انتي
عجبني قوي موضوع النتيجة ده
طيب يا ترى انهرده اللي هوا عين ميلادك
كانت الحكمة ايه في النتيجة

يوم كئييييييب
هههههههههههههههههههه
ولا ايه ؟!!!! اعترفي


المهم كل سنه و انتي طيبه يا قمر
طيب والله حلو قوي .. قهوة و نسكافية .. حاجه جديده بقا
تغييييييييير


هديتي
خدي بوسه كبيره بقا
هاتي خدك
؟!
هاتي خدك ما تتكسفيش
؟ يا بنتي هاتي خدك
ايه يا خواتي ده




































جبتيه ؟!
طيب
خلاص مليش نفس بقا
هههههه

لاف يو يا قمر
زيزي

ghalia said...

يا حبيبتى ياروفروف
متشكرة أوى على الكلام الجميل ده
وربنا يعلم إنتى غالية عليا أد ايه
بس شايفاكى بتقولى كل سنة وانتى طيبة
فى وشى يا روفى بتقوليها ومش خايفة هههههههههههه
طبعا يا بنتى يناير شهر العظماء أمال ايه
ده كفاية أوى أنا وانتى وخيخة ;)
نورتى يا روفى
بقلك ايه
خدى حتتين جاتوه من تحت لتحت كدة واقعدى على جنب كليهم
اوعى بس حد يشوفك ههههههههههههه
مبيطلعوش غير للحبايب

ghalia said...

على حب
ههههههههههههههه
ملعوبة يا على
بس صدقنى مفيش تشاؤوم ولا حاجة
أنا بس بيصعب عليا عمرى اللى بيعدى يمكن لأنى لحد الآن حاسة إنى معملتش فيه حاجة مهمة
الانسان لما بيتولد بيصغر ولا بيكبر
يلهوى ده باينو كدة سؤال ذكاء
والذكاء للأسف غير متوفر لدينا حاليا
ممممممممم طيب مفيش اختيارات
هو أكيد طبعا بيكبر أمال ايه
عموما لو غلط مشيها كدة وخلاص متفضحنيش الله يستر عليك
نورتنى و ابقى تعالى علطول :)))

ghalia said...

فرنستى
هههههههههههههههههههه والله ضحكتينى
عظم الله أجرك انتى وكل أهل السويس
معلش يا جميل شكلى خضيتك بجد
بس أعمل ايه لزوم التمويه بقىعلى رأى خوخة
نياهاهاهاهاهاع
وانتى طيبة تسلميلى وربنا ما يحرمنيش من طلتك دى
:))))))

ghalia said...

صاحب المضيفة
أهلا بيك يا أفندم :)
انت كمان بتقللى كل سنة وانتى طيبة؟
دى مؤامرة بقى ههههههههه
وانت طيب وتسلملى على الدعوة الحلوة دى
واحنا فديك الساعة لما يصادف عيد ميلادى عيد ميلاد خوخة
;)

ghalia said...

خووووخة
شايفة
طلعنا قرايب أهو وبرج الجدى زى بعض
بجد برافو عليكى انك محتفظة بالقناعة دى ومبيفرقش معاكى الموضوع ده
لأنو إحساس متعب وغلس
عموما أنا سمعت نصيحتك ومسكت التورتاية نسفتها :D
كلامك دخل دماغى أوى يا نور
وعشان كدة حديكى حتة من التورتاية
مش خسارة فيكى
ادخلى البلكونة كليها بس اوعى حد يشوفك

ghalia said...

صالح سعيد
وانت طيب وتسلملى يارب
المهم انك جيت
وكفاية أوى الدعوتين الحلوين دول
ويارب كل سنة وانتو معايا
:)))

ghalia said...

أحمد
وانت طيب
متشكرة أوى يا أحمد
نورت :)

ghalia said...

ذو النون
وإنت طيب :)
مبسوطة إنك جيت
زيارتك دى أجمل هدية
يااااااه خمسين مرة
ربنا يسمع منك و يستمر تواصلنا علطول
لو عايز الموسيقى أو الكود بتاعها قللى وأنا ابعتو لك إن شاء الله

ghalia said...

ذو النون
وإنت طيب :)
مبسوطة إنك جيت
زيارتك دى أجمل هدية
يااااااه خمسين مرة
ربنا يسمع منك و يستمر تواصلنا علطول
لو عايز الموسيقى أو الكود بتاعها قللى وأنا ابعتو لك إن شاء الله

ghalia said...

truelove
ازيك يا بيبو اخبارك ايه يا قمر
ربنا يخليكى ويسمع منك الدعوات الجميلة دى
على فكرة حقلك على سر بس بينى وبينك
غالية ده مجرد نك نيم أنا بحبو
لكن لو عايزة اسمى الحقيقى قوليلى يا رنون أو يا رنوش ;)
بالنسبة للميل أنا فعلا وصلتنى الإضافة بس مش بفتح الجميل كتير
عموما خدى الهوتميل أحسن
oneway20@msn.com

ghalia said...

حااااااااااازم
ياااااااااه يا حازم
وانت طيب
والله مجيتك دى عندى بالدنيا
ليك وحشة بجد
يلا بقى ارجعلنا ونور مدونتك تانى
بجد أحلى مفاجأة
يلا بقى مستنيينك فى أقرب وقت :)))

ghalia said...

أجندا
وانتى طيبة يا حبيبتى تسلميلى يارب
المهم انك جيتى ونورتينى
ربنا ميحرمنيش منكو أحلى إخوات
:))

ghalia said...

أمير الهدوؤء
أهلا أهلا يادى النور
متخافش لسه الصوان منصوب
قصدى لسه الحفلة شغالة :p
ربنا يخليك يا أمير
هههههههههههههههههه متخافش انهردة 16
يعنى قول كل سنة وانتى طيبة براحتك
ربنا يخليك يا أمير
بتحرجنى والله لما بتفتكرنى وأنا مقصرة معاك
يلا أنا جايالك حالا بعد ما اخلص ردود
:))

ghalia said...

زييييييييزى
وانتى طيبة يا حبيبتى
أخيرا جيتى والله مستنياكى من الصبح
يا ستى الحكمة فى النتيجة كانت حاجة حلوة طبعا تليق بيوم عظيم زى ده بس مش فاكراها صراحة
ال يوم كئيب ال هههههههههه
هههههههههههههههههههههههه بقى كدة اديكى خدى تبعتينى
تييييييب مش مدياكى حتة من التورتاية
:p ها
تيب خلاص خلاص متعيطيش
متهونيش عليا
تسلميلى أحلى زيزى :)))

رئيس جمهوريه نفسى said...

كل سنه وانتى طيبه

Anonymous said...

يااااااااااه
دانا متاخرة اوى ووحشه اوى اوى



كل سنه وانتى طيبه يا غاليه يا جميله
وعقبال مليون سنه
انتى عامبه زى انا كمان مبحبش اكبر ومبحبش السنه تعدى ومكنتش عملت فيها حاجه
بس اهى بتعدى وخلاص

سلامى يا جميل ومتزعليش منى
:))))))))))

بحبك يامصر said...

كل سنه وانتى طيبه
والسنه الجايه زى النهارده تكونى زعلانه برده عشان عدت سنه من عمرك
كل سنه وانتى بالف خير

مدحت محمد said...

كل ده عشان تقولى انى ده عيد ميلادك
كل سنة وانتى طيبة
ويارب عقبال ميت سنة
والسنة الجاية ان شاء الله تكونى فى بيت العدل
مش عارف بقى هتكتبى تقولى ايه ساعتها
سلام

دكتور كسلان said...

كل سنة وانت طيبة
وبالف خير وصحة وسعادة
والسنة اللى جاية تكملى ال24 سنة
زى ماانا كملتهم بس الشهر اللى فات

ربنا يخليكى لمامتك ويديم عليكى السعادة يا رب

سلام

DR.HAMAS said...

أختنا الغالية غالية

كل سنة و حضرتك طيبة

و ربنا يطول فى عمرك

و تخدمى بلدك و أمتك و دينك أكتر و أكتر

و انبسطت لكلامك الظريف بصراحة

و على فكرة

الاستعارة المستكنية من فى النحو
دى فى البلاغة

يلا بقة ميضرش

يعنى دى الوحيدة يعنى ؟؟

هههههههه

ربنا يكرمك

و عقبال 800 سنة قدام

اشمعنى 800 ؟؟؟

مش عارف

بس ده عمر دولة الأندلس

ملهوش علاقة

بس اللى حصل بقة


كل سنة و انتى الى الله أقرب
و على طاعته أدوم





د.حمــــــاس

ghalia said...

وانت طيب يا ريس
متشكرة أوى يا محمود

ghalia said...

شيماء
وإنتى طيبة يا شيمو
المهم انك جيتى :)

ghalia said...

بحبك يا مصر
وانت طيب ربنا يخليك

ghalia said...

doha
معلش بقى لزوم التمويه
وانت طيب
متشكرة على زيارتك أوى

ghalia said...

دكتور كسلان
وانت طيب
فينك كدة مش باين
كل سنة وإنت طيب ولو انها متأخرة
متغيبش علينا كدة
سلام يا دوك

ghalia said...

دكتور حماس
اهلا وسهلا بيك
وحضرتك طيب
وربنا يارب يسمع منك ومتشكرة أوى على الدعوتين الحلوين دول
نورتنى يا دوك :)

3ala asm masr said...

لاااااا اله الا الله
خايفه اقولك كل سنه وانتى طيبه بس هى جايه بعدها بكتير اهو يعنى زمانك تكيفتى مع الوضع
كل سنه وانتى طيبه بقى

oceaneyes said...

ايه ده ؟!!!

وحدوووووووووووووه مرة واحدة !!

طيب لو كدة بقى يبقى البقاء لله ..والله كان شخص عسل ..يالا خير

الله يرحمه


لالالالالالالالالالالالالالالالالالالا



بعد الشر طبعا طبعا طبعا


ايه يا جميل بس ..ما كلنا هانكبر ان شاء الله ونبقى عواجيز وكراكيب وحاجات كتيرة كدة فى بعضيها ..وبعدين ده انتى لسة صغننة

كل سنة وانتى طيبة يا رب مع انها جاية متأخرة ..بس ظروف امتحانات والله ..مش بإيدى فعلا


ولو على الهدية ..فمش هاديهالك الا لما تديلى الجاتوه بتاعى


طبعا يعنى ..الا الجاتوه والحاجات دى ..


:D



كل سنة وانتى طيبة تانى


تحياتى

:)