Google

Monday, January 21, 2008

مطـــــــر ...


في عز الشتا آخر السنة
لما المطر ينزل علينا يبلنا
والدنيا هادية والسما مغيمة
بتمر على بالى صور قديمة معتمة
صور لبنوتة جميلة صوغننة
كانت هنا من كام سنة
===========
في عز الشتا كل سنة
لما المطر ينزل يغرق حينا
تجري على الشباك رنا
ترفع إيديها تدعى لربنا
وتقللو أحلامها البريئة المستحيلة الممكنة
أحلام بسيطة كلها حب وأمل
مفيهاش ألم مفيهاش جنون ولا شعننة
===========
وعدت سنة ورا سنة
وكبرت رنا
مبقتش بنت صوغننة
مبقيتش أحلامها بريئة وممكنة
مبقيتش عارفاها أنا
مبقيتش شايفاها أنا
نفسى أشوفك يا رنا
نفسى ألمسك نفسى أحضنك ونعود سوا علي حينا
===========
في عز الشتا من كام سنة
البنت دي كانت أنا
وأنا من يوميها كل ما بشوف المطر
بجري على الشباك وأدور فى الشوارع والبشر
يمكن أكون فيهم أنا
يمكن أشوف صورة رنا
.................................................................
تحديث
إضافة رائعة من إيهاب الشنكوتي الكبير

وفي لمعة النور على المطر
بنشوف سبع الوان تبان
الوان تنادي للي تايه من زمان
هنا الطريق
هنا المكان
ارجع في الوان السما السبعه الجنان
انا قلت ممكن تسأليه عن بنت تاهت من زمان
قلتي اسمها رنا كمان
اهي هناك واقفه بتلعب في المطر
رافعه ايديها بتدعي لربنا
قالتلها جدتها ادعي يا رنا
وقت المطر
باب السما بينفتح
وانتي كمان ادعي معاها انها
ترجع تلاقيكي هنا
تحت المطر مستنياها من زمان

انا عارف الفستان كمان غرقان مطر والبرد حامي على الأيدين المرفوعين
لكن شوية صبر يا مؤمنين
ولما ترجعلك رنا
ابقي احضنيها قوي قوي
هتلاقي جواها الدفا

وياريت كده لو تقدري
وانتي هناك بتدوري
تشوفي طفل عبيط كده
تايه كمان من كام سنه
اسمه انا


73 comments:

Anonymous said...

هييه اول تعليق

هحجز وارجع

:)))))))))

Anonymous said...

رجعت
:))
يخرب عقلك
تحفففففففففففه

هتصدقينى لو قلتلك ان رنا دى شبهى اوى
انا كمان بدور ومش لاقياها
بجد بجد انتى كاتبه الكلام ده ليا انا


بجد بوست هايل يا رنا
:))))))))))
وعرفت اسمك
هههههههههههههه

سلامى يا قمر

ღϠ₡ღأمير الهدوءღϠ₡ღ said...

هعيط هعيط هعيط
حرام عليكي
بوست راااااااائع

كلمات مليانه عواطف وإشتياق وحنين للماضي

بس نعمل إيه في عقرب الثواني

بجد جميييييييله جدااااا

الربان said...

تحياتي يا رنا

ممكن اقولك ان كلنا نفقد انفسنا احيانا...و البعض منا يبحث عنها و يستردها...و البعض الاخر بيحاول...و الجزء الاخير لا يحاول ان يسترد نفسه و يتركها للمجهول....

أنظري داخلك ...التقطي انفاسك في هذه الدنيا المتسارعة الاحداث...و بالتأكيد ستجدي رنا البنوته الصغنونه
داخلك و في انتظارك.

تحياتي و دمتي بألف خير

رئيس جمهوريه نفسى said...

الغريب ان يتشابه البوستان على البلوج عندى وعندك عن المطر بس اقر انى بوستك احلى

Unknown said...

مش هقولك غير جملة واحدة
انتى بجد عبقرية بشوف البوست دة من احسن ما قريت فى كل المدونات

دكتور حر said...

بسم الله ماشاء الله

مدونة جميله
وتدوينه رائعه

مكنتش متوقع ان رنا تكون انتي

قلت هتكون اختك مثلا أو حاجه
لكن تدوينه جميله شعشعت مشاعر أجمل
كل عام وأنت بخير
وسعيد بالتعرف على المدونه

ghalia said...

شيماء
أنا عارفة ان الكلمات بتعبر عن ناس كتير مش بس عنى
كويس إنى قدرت أوصلك الإحساس بإن البوست ليكى انتى
نووورتى اول تعليق يا شوشو
:)))

ghalia said...

أمير الهدوؤء
عقرب الثوانى ماشى فطريقو
زى القطر مفيش حاجة ممكن توقفو
وللأسف الأيام مبترجعش لورا
نورت البوست يا أمير

ghalia said...

الربان
أعتقد إنى من النوع التانى اللى لسه بيدور علي نفسه وإن شاء الله حلاقيها قريب
أناحاسة بكدة
تحياتى العميقة لحضرتك
ومبسوطة إنى شفت تعليقك الجميل ده :)

ghalia said...

رئيس جمهورية نفسى
فعلا مصادفة حلوة
وأنا بشكرك على جدا على زوؤءك لكنى شخصيا وقبل ما اقرأ بوستك متأكدة انو أروع من الروعة
إنت أستاذ
ده كفاية بوست المرايا لحد دلوئتى مش ناسياه

ghalia said...

نوراى
كفاية أوى اللى قلتيه يا نور
مبسوطة أوى ان البوست عجبك
تسلميلى يا قمر :)

ghalia said...

دكتور حر
اهلا وسهلا بيك يا دوك
أنا فعلا تعمدت أخبى شخصية البنت لحد آخر سطر
أنا اللى مبسوطة بزيارتك ليا
وبتعليقك الحلو
:)

ا بـن عــمــر said...

بوست رائع
أعاد الى حنين الماضى
جزاكى الله خيرا

raspoutine said...

اولاً السلام والتحية ليكى يا غالية
انتى عارفة ان اول مدونة عملتها كانت اسمها بكرة اكيد احلى والكلام ده كان من كام سنة كده وكنت فعلاً بحبها اوى وكان زوارها كتير اوى لكن لسبب معين قفلتها للأبد
المهم مدونتك انا دخلتها بالصدفة وهيا فعلاً جميلة
والموسيقى اللى انتى حطاها دى جميلة جداً تحياتى ليكى

ايمن فاروق

إبن مصر said...

الله يا رنا

بجد كلمات جميله وبوست رااااااائع

Ehab said...

وفي لمعة النور على المطر
بنشوف سبع الوان تبان
الوان تنادي للي تايه من زمان
هنا الطريق
هنا المكان
ارجع في الوان السما السبعه الجنان
انا قلت ممكن تسأليه عن بنت تاهت من زمان
قلتي سامها رنا كمان
اهي هناك واقفه بتلعب في المطر
رافعه ايديها بتدعي لربنا
قالتلها جدتها ادعي يا رنا
وقت المطر
باب السما بينفتح
وانتي كمان ادعي معاها انها
ترجع تلاقيكي هنا
تحت المطر مستنياها من زمان

انا عارف الفستان كمان غرقان مطر والبرد حامي على الأيدين المرفوعين
لكن شوية صبر يا مؤمنين
ولما ترجعلك رنا
ابقي احضنيها قوي قوي
هتلاقي جواها الدفا

وياريت كده لو تقدري
وانتي هناك بتدوري
تشوفي طفل عبيط كده
تايه كمان من كام سنه
اسمه انا


سلاااااااااااااااااااااام

الـسـيـدة نـون said...

هو انا ليه جسمى قشعر وانا بقرا القصيدة دى
هو انا ليع عيطت اوى كدة لما خلصت قراية
هى ليه القصيدة دى فكرتنى بطفولتى
هو انا ليه بتشحتف اوى كدة
اكونش انا رنا اللى فى القصيدة
ولا دى يمكن واحدة تشبهنا كلنا من جوة
جامدة اوى يا غالية
جامدة اوى
تحياتىليكى
اختك خيخة

Ahmed EIssa said...

لو في ايدي اديكي جايزة احسن بوست قريته خلال السنة اللي قضيتها في التدوين دي..حديهالك

من اكتر البوستات اللي حستها قوي قوي..بجد مش عارف اقولك ايه

هايل هايل هايل

فرنسا هانم said...

كلامك جميل جدا
بس على فاكره
ركزى اوى على صوره رنا بتاعه دلوقتى
علشان كل ما بيعدى العمر بنفتكر الايام الماضيه ونتغزل فيها
يعنى رنا بتاعه انهارده عيشيها واتمتعى بيها
لا الزمن بيمر وهترجعى تدورى عليها
فهمانى ولا ايه ؟؟؟؟

ghalia said...

ابن عمر
الحنين للماضي شئ جميل
مبسوطة إنى ساعدتك على استرجاعه
:)

ghalia said...

أيمن فاروق
وعليكم السلام والإكرام
جميلة أوى الصدفة اللى جابتك هنا
سعيدة بزيارتك
وبالنسبة للموسيقى إسمها طفل حزين فى ليلة العيد
لو عايز الكود بتاعها قللى وأنا ابعتو لك
نورت البلوج يا أيمن

ghalia said...

ابن مصر
ده من زوؤءك الحلو
:)

ghalia said...

إيهاب
يخرب عقلك
أنا مش عارفة أقللك ايه
ومش لاقية كلام ازوده على كلماتك الرهيبة دى
اسمحلى اضيف كلماتك للبوست
لأنى حاسة إنها تكملة للمعنى اللى كان جوايا بس مكملتوش

ghalia said...

خيخة
تصدقى وقت ما كنت بكتبها كنت حاسة نفس الحاجات اللى انتى حسيتيها
وسبحان الله حتى الآن معظم اللى قرأوها وصلهم نفس الإحساس ده
أعتقد زى ما انتى قلتى إن جوة كل واحد مننا صورة للبنوتة الصغنونة أو الولد الشقى الجميل اللى كان جوانا زمان
مكنتش عايزة ابكيكي :)
نورتى البوست يا نوران

ghalia said...

أحمد عيسى
يااااااه يا أحمد
الكلمتين دول أحسن من مية جايزة
متتصورش بنبسط أد ايه لماأحس إن الكلام اللى بكتبوا بيوصل للناس وبيحسوه
:)

ghalia said...

فرنسا
كلامك مظبوط والله
عادة الإنسان بيفتقد كل شئ راح منو
ومبيعرفش قيمة الأشياء إلا بعد ما بتروح منو
ويمكن لما نكبر شوية نفتقد الأيام دى اللى مش عاجبانا حاليا
وجهة نظرك جميلة جدا ووصلتنى
نورتى أحلى خالتو :)

Empress appy said...

حلو الكلمات على الرغم من انى مليش فى الشعر بس بشوف ناس بفهم احاسيسهم وحياتهم عن طريق كتابتهم

أحمد المصري said...

يخرب بيت كده..يخرب بيت كده كمان مرة..معلش أصل ساعات الكلام بيطير عقل الواحد..قصيدتين أجمل من بعض و مش عارف أقول ايه..الإبداع محتاج إبداع عشان يوصفه..وانا مش مبدع لدرجة ترقى لمدح إبداعك..شكرا ليكي0

Doaa Ebrahim Aaql said...

لا أكثر ولا أقل


الكلمات رااااائعة بل أمثر من رائعة

وكلمات ايهاب كذلك
كم أعجبتنى

.
.


خالص تحياتى لكما

صالح سعيد said...

الكلام حلو بس الجزء الاخير احلى بصراحه
بس مش عارف ليه بحس ان الكلام على المطر بيبقى له سحره الخاص
حتى الحاجه اليسا سمت البومها اواخر الشتا
فعلا الشتا له سحر خاص
على مشاعرنا
ممكن يبقى احتياج الانسان للدفء
زى احتياجه للحب
اظن ذلك

Anonymous said...

كلمات جميله ياغاليه و فعلا جوه كل واحد فينا طفل نفسه يطلع بس مع مرور السنين البراءه جوانا بتختفي بنحاول نحافظ علي الأحلام و نحاول نوصلها مره تصيب و مره تخيب اهم حاجه نحاول

تحياتي علي البوست المميز ياجميله

. said...

نفسنا نلاقي رنا
وسدرة
وأحمد
ومدحت ههههههههه وخالد
المهم ان لازم تعرفي اننا مختافيناش احنا بنطور كل يوم عن الي قبلو
وعمرك ما هتكوني في النهاية غير رنا
وانا عمري ما هكون غير سدرة
واحمد ومدحت و خالد
هههههههههههه
بوستك جميل اوي
تحياتي

Hadota ... حدوتة said...

حلو اوى البوست دا
الشتا والبنت الصغيرة والاحلام اللى ضاعت منها
ياااااااه
احساس عالى ومتدفق جدا

كلام فى غاية الروعة

تحياتى .. مدونتك كلها على بعضها حلوة اوى

زى الهوا said...

شوقتينى لايام زمان اووووى , بلوجك عجبنى اوى وخصوصا اسمه بكرة اكيد احلى , إن شاء الله هيبقى احلى ياقمر وربنا يدوم عليكى بالتفاؤل دا

البِـئرُ والظمّأْ said...

غاليه


بجد مش عارفه اقولك ايه
بس متتخيليش انا قد ايه حسيت حجات حلوه بعد قرايتي للبوست ده
جميل يا غاليه
حلو قويييييي



زيزي

مؤمنه said...

السلام عليكم ورحمة الله وبركاته
جميل أوى البوست
أنا برده بحن أوى لأيام الطفوله ولما أشوف نفسى دلوقتى وأشوف صورتى وأنا صغيره أتمنى كنت أموت وأنا لسه صغيره حيث البرأءه والنقاء
مش هدور على الطفوله لانها عمرها ما هترجع بس هحاول قدر البامكان ارجاعها فى ذاتى وأنا كبيره مش انتى لسه قايه أحلام مستحيله لكن ممكنه
والسلام عليكم ورحمةالله وبركاته

Soooo said...

قريت موضوع ماشفتش زيه من كتير
لاتنين صحابي شعرهم حلو وخطير
الأوله اسمها غاليه وغاليه علينا
والتاني صاحبي واسمه شنكوتي الكبير

وندمت اني ماشفت الكلام ده من زمان
وزعلت اني ضيعت التعليق الأول كمان
بس رجعت وقلت لنفسي عادي خالص
المهم انك قريته وعجبك .. بيس يا مان

اتنين بيردو على بعض بكلام حلو وجميل
ماشفتش ولا هشوف زيه مثيل
ومن النهارده انا هقولها وربي شاهد
اني هتابع موضوعاتكم حتى لو كنت انا قتيل







سلاموووووووووووز

الـسـيـدة نـون said...

لا انا مش جاية اكتب حاجة جديدة
انا جاية احى الشنكوتى الكبير من خلا مدونتك
وهو كدة دايما الشنكوتى يسيب تعليق يقطع القلب وتنه ماشى
تحياتى ليكى يا غالية وتحية كبيرة اوى لايهاب الشنكوتى
سلام
اختكم خيخة

DR.HAMAS said...

الله الله الله

ايه الروعة دى

ابداع و الله

سواء من أختنا غالية أو أخونا إيهاب

حقيقى كلام عالى


جزاكم الله خيرا


بجد استمتعت من الكلامات جدا



د.حمــــاس

لسه بعقلى said...

جميل جميل جميل
انا بحب المطر علشان بيخلينا نطلع المواهب اللى زى حضرتك كده
جمييييييييييييييل

ღϠ₡ღأمير الهدوءღϠ₡ღ said...

التحديث جمييييييييل جدااااااااا

Abd-Alrahman said...

كلمات جميلة جدا
لمست احساسي حركت مشاعري
يقف قلمي حائرا ماذا اكتب امام هذا الاعجاز
عزيزتي لقد تلاعبتي بالكلمات وسطرتيها بحرفية فلك مني جزيل الشكر والامتنان
مدونتك من اجمل ما زرت من المدونات
احييكي علي امتلاكها
دي كانت زيارتي الاولي لها

Ehab said...

انك تضيفي تعليقي البسيط
جنب كلامك الجميل ده
دي بجد احلى واجمل جايزه ممكن اخدها

في داهيه الموبايل اللي ضاع مني
تصدقي ربنا كرمني بشوية اصحاب الحمد لله
خلوني عرفت ان ميت موبايل ميساويش احساسك بصديق

بجد اشكرك
سلاااااااااااااااام

dr.Roufy said...

الله..
بجددددد
الله عليكي يا رونا انتي وايهاب
خليتيني أحس باحساس فعلا ..دايما بيزورني وقت المطر..والبرد
احساس اني نفسي الاقيني وانا صغيرة
واحضنني قوي..وماسيبش روفي الصغيرة دي من حضني أبدا
كلامك رااااااائع يا غالية
لمسني بجد

على فكرة ليكي عندي تاج ياجميل..عدي وخديه بقى

مدونة يلا نفضحهم said...

عاجل الانباء
تم اصدار قرار تجديد الاعتقال للدكتور الزعفراني بعد الافراج عنه مرتين وهو الان في سجن الغربانيات في برج العرب بعدما كان محتجز في الترحيلات

شاركنا في التوقيع علي وثيقه اطلاق سراح الدكتور ابراهيم الزعفراني

oceaneyes said...

ايه يا جميل الكلام الحلو ده !!!

لا بجد عجبنى اوى ..اخيرا دخلت عندك بعد فترة طويلة اووووووووى ..حستها سنة كدة ولا حاجة

وحشتينى اوى بجد ..وان شاء الله هانط عندك كتير كل ما اقدر ..

هاعمل لفة كدة على باقى البوستات اللى انتى كتبتيها


وابقى طمنينى عليكى يا جميلة


تحياتى


:)

ghalia said...

appy
إنتى الأحلى يا جميلة
مبسوطة إن البوست عجبك برغم انك ملكيش فى الشعر
نورتى

ghalia said...

أحمد المصرى
الحمد لله عالسلامة يا دوك
نووووورت البوست وعالم التدوين كلو
كلامك أسعدنى جدا يا أحمد
:)

ghalia said...

برنسيس دودو
إنتى الرائعة
من بعض ما عندكم
:)

ghalia said...

صالح سعيد
أكيد الشتا له سحر خاص
أنا كمان بتفق معاك إن الجزء الأخير أحلى
لذلك حسيت إن ضرورى إضافته للبوست
نورتنى :)

ghalia said...

أجندا
طبعا لازم نحاول
وزى ما قلتى مرة تصيب ومرة تخيب
تسلميلى يا حبيبتى على زيارتك الحلوة :)

ghalia said...

سدرة
أول حاجة أهلا وسهلا بيكى
فين الغيبة دى كلها
كلامك بتفق معاه
وأنا فعلا ما حاولتش أكون حد غير رنا
كل الحكاية إن رنا الصغنونة وحشتنى :)

ghalia said...

حدوتة
إنتى الأحلى
تسلميلى يارب على الكلام الجميل
ومبسوطة إنى قدرت أوصللك الإحساس ده
نورتى :)

ghalia said...

زى الهوا
يا اهلا وسهلا بيكى :)
سعدت بزيارتك أوى وعجبتنى مدونتك جدا

ghalia said...

زيزى
حسيتى بحاجات حلوة
ده أهم حاجة
وأنا مش عايزة أكتر من كدة
متتصوريش بنبسط أد ايه لما أكتب كلام يترك أثر عند الناس
تسلميلى يا قمرة :)

ghalia said...

مؤمنة
سلامة قلبك يا جميلة
أنا مااتمنيتش اموت وانا صغيرة
بس أوقات بشتاق للأيام دى
ولما كتبت البوست كنت بمر بالحالة دى
عجبنى توصيفك ده أوى
ومبسوطة بزيارتك الأولى ويارب تتكرر :)

ghalia said...

سووووو
ههههههههههههههههه
حلوووووو أوى
كانت فين المواهب دى
طلعت شاعر انت كمان وانا مش عارفة

ربنا يخليك يا رب على الكلام الكبير أوى ده
:)

ghalia said...

خيخة
أهلا بيكى يا حبيبتى تشرفى فى أى وقت
أنا كمان بحيى ايهاب على احساسه العالى ده اللى بيخليه اوقات يحط رد أحلى من البوست نفسه

ghalia said...

دكتور حماس
يا اهلا وسهلا
ده زوؤءك الحلو يا دوك
متشكرة على تشجيعك ده
نورت البوست :)

ghalia said...

لسه بعقلى
ومين ما بيحبش المطر
برغم إنى أخدت دور برد لحد الآن مش عايز يروح منى
بس برغم كدة بعشق المطر
وبعشق المشى تحته
نورت البوست :)

ghalia said...

أمير الهدوؤء
ده زوؤءك الجميل يا أمير

ghalia said...

dr online
يا أهلا بك
سعدت جدا إنى استطعت ألمس إحساسك وأكتب شئ ينال على إعجابك
متشكرة جدا على الإطراء الجميل
ونورت فى أول زيارة
بتمنى تتكرر :)

ghalia said...

شنكوتى
تعليقك مكانش مجرد تعليق
أنا حسيتو أوى أوى وحسيت انك عبرت عن باقى المضمون اللى كنت عايزة اعبر عنه بس معرفتش
أنا اللى بجد بشكرك يا ايهاب
إنت أضفت كتير للبوست
:)
نورتنى

ghalia said...

رووووفى
فعلا الإحساس ده بيزورنا كلنا وقت المطر
ابقى احضنى روفى أوى حتلاقى جواها الدفا زى ما قال ايهاب

شفت التاج
تسلميلى يارب عالتمريرة دى
وربنا يقدرنى اجاوب عليه قريب

ghalia said...

oceaneyes
أهلالالالالالالا
واحشانى موووووت يا كوين
اخبار الامتحانات ايه
إن شالله كلو تمام وتكونى رفعتى راسنا كدة
أنا مبسوطة أوى بعودتك
ونورتى الدنيا كلها يا قمر :)

أحمد جلال said...

فينك و فين جديدك؟

بحبك يامصر said...

الكلام الجميل ده ينفع اغنيه حلوه واللى تغنيها اصاله
هتكون اغنيه تحفه

Anonymous said...

انتى فين يا غاليه؟؟؟
روحتى فيييين

شبــ اون لاين ـــاب said...

غاليه
احنا محتاجين رايك فى موضعنا الجديد
و معلش اذا احنا قصرنا فى الزيارات لكن بجد غصب عننا

مستنينك

Rain man said...

اعشق الذكريات
تلك التى ينكرها السحاب
و يحكيها المطر

لازلتِ رائعة

ghalia said...

تسلمولي جميعا على السؤال
أنا بخير الحمد لله
نورتووووووووو :)))))

LOST said...

رائعه!!! انا اول مره اشوف المدونه بتاعتك.. كلمات رائعه.. بجد استمتعت بها و كمان بالاضافه الجميله

http://3ala-do2-elqamar.blogspot.com