الإغتصــــــــاب .... جريمـــــة لا تغتفـــــــــر

تاثرت جدا وانا بتابع احداث مسلسل قضية راى عام بتاع يسرا
اكتر حاجة أثرت فيا طبعا مشهد الاغتصاب اللى قدموه بشكل رائع جدا لدرجة انى كنت حاسة انو مش تمثيل
وانا بشوفو سرحت شوية وفكرت :
يا ترى ايه اللى ممكن يحول البنى آدم لوحش بشرى بالمنظر اللى شفتو ده؟
ايه اللى ممكن يخليه ينسى كل شئ فى لحظة
ينسى انو ممكن يضيع مستقبلو لو الموضوع انكشف
ينسى إنو اللى بيعملو ده حيدمر حياة إنسانة ملهاش اى ذنب غير ان حظها وقدرها وضعوها فى طريقه فى اللحظة دى
ينسى انو بيقتلها بايديه مش بس بيدمرها نفسيا ويخرب حياتها ومستقبلها
ده يعنى لو اهلها ما عملوش اللى بيعملوه ناس كتير وقتلوها عشان يدفنوا عارها وسرها معاها
يعنى الجريمة جريمتين بيرتكبهم نفس الشخص
قتل + إغتصاب
ايه اللى يخليه ينسى انو له غالبا اخوات بنات وإنهم قالوا زمان إعمل ما شئت كما تدين تدان وإن الله سبحانه وتعالى مستحيل يرضى بغير القصاص ومستحيل يضيع حق مظلوم
اذاى ينسى كمان انو اللحظة اللى اغتصب فيها البنت دى حتكون لحظة فاصلة ونقطة تحول كبيرة فى حياتها وان كل حياتها اللى فاتت شكل واللى جاية بسببو حتكون شكل مختلف تماما
سواء كانت المرأة الى اغتصبت متزوجة او مش مرتبطة

وأهم من ده كلو

اذاى بيقدر ينسى ان الله سبحانه وتعالى شايف كل شئ ومطلع على كل شئ وان الأولى والأحرى انو بدل ما يخطف البنت فى مكان ما يشوفوه الناس يدورلو على مكان الله ما يشوفوش كمان
إذاى بيقدر ينسى انو اللى بيعملو جريمة بشعة يستحق بسببها إقامة حد الزنا اللى بيكون رجم حتى الموت لو كان متزوج
ومائة جلدة لو مش متزوج
إذاى بينسى إنو إنســـــــــان وانو باللى بيعملو بيتخلى عن انسانيتو وينحدر لأدنى درجات الحيوانية والوحشية
إذاى بيقدر يلغى عقلو وينسى ده كلو ويلغى التفكير فى أى شئ
و ما يكونش شايف قدامو غير بس الشهوة الحيوانية والرغبة الزائلة والمتعة الزائفة
يا ترى احساسو بعد ما بيعمل عملتو بيكون اذاى؟
هل بيحس بالذنب زى أى إنسان؟
ولا الموضوع بيكون عادى بالنسبة له ومش فارق معاه أصلا؟
غريب بجد
اذاى الناس اللى بيعملو كدة فى بنات الناس بيقدروا يناموا وعيونهم تغمض؟
والمصيبة الأكبر انو مجتمعنا كمان للأسف بيشجع الحوادث اللى من النوع ده
ايوا بيشجعها
بيشجعها لما يداريها وينكرها ويعتبرها فضيحة محدش لازم يعرف بيها برغم اننا لو واجهنا المجرم بجريمتو واخد عقابو عليها حيكون عبرة له ولغيرو من الناس
بيشجعها لما يعتبر البنت هى المجرمة -وكأنها قالتلو والنبى تعالى اغتصبنى علشان خاطرى-
بيشجعها لما المجرم يعمل عملتو ومحدش يدور عليه وده طبعا حيخليه يكرر اللى عملو مرة واتنين وكل يوم كمان لو يقدر

فى بيت شعر جميل جدا بيقول :
من يهن يسهل الهوان عليه

ما جرح بميت إيلام

وربنا يستر بقى .