سنـــة أولـــي تـــــــاج

صباح الخير عليكو

التاج ده كانت بعتتهولى دكتور روفى من حوالى قرن تقريبا

ده أول تاج يوصلنى من وقت ما بدأت أدون

وسبحان الله فى كل مرة امسكوا وأقول أحطو انهردة ألاقى حاجة حصلت

أرجع اقفلوا وأقول خليها يوم تانى

النهردة كنت فاضية ورايقة وقررت أجاوبوا وخلاص

لو قالولك اختار عصر من عصور مصر
علشان تعيش فيه
تختار اى عصر و فى عهد اى حاكم..واشمعنى.؟
مش فارقة معايا
لأن كل عصر فيه إيجابياتو وفيه سلبياتو بس الأكيد إنى مكنتش حختار العصر اللى أنا عايشاه ।

اول اولويه فى حياتك
عيلتك
شغلك
ولا
اصحابك؟
والله وبأمانة التلاتة يعنولى كتير أوى
أكيد عيلتى وأصحابى أهم بكتير من شغلى
لأنى أصلا لسه ملقتش شغل هههههههههههه

ايه اكتر حاجه بتحبها فى رمضان؟
جو رمضان كلو على بعضو يجنن
اللمة والعزايم وصلة الرحم اللى بتكون بشكل أكبر والفوانيس اللى بيلعبو بيها الاطفال والزينة و الأنوار اللى بتملى الشوارع والراجل اللى بيقول مدفع الافطار اضرااااااب كمان بحب اسمعو جدا

اوصف ليا اجمل فطار ممكن تفطره
أجمل فطار بالنسبة لى إنى أكون بفطر وسط الناس اللى بحبهم سواء أهلى أو اصحابى
وأهم حاجة فى الفطار كلو الميا
انهردة مثلا كنت فطرت برة مع أصحابى ونسينا ناخد ولا نشترى ميا وبرغم إن الوجبة كان معاها حوالى نص لتر بيبسى بس أول ما رجعت البيت دخلت على التلاجة ومسكت أكبر إزازة كأنى عطشانة من سنين .

لو انت حاكم على مجموعه من الافراد هتكون عادل؟؟
طب هتعمل ايه عشان تتأكد انك حاكم عادل؟
أكيد حعمل اللى ربنا يقدرنى عليه عشان ما اظلمش حد لأن الظلم أبشع إحساس ممكن يحسو الإنسان
ده غير إن الرسول عليه الصلاة والسلام شدد أوى عالموضوع ده وقال ( الظلم ظلمات يوم القيامة ) وفى حديث تانى بيقول ( كلكم راع وكلكم مسئول عن رعيته ) حديث كمان بيوصينا الرسول إننا ما نسعاش أبدا للمناصب , وقال لأبو ذر لما طلب منو يوليه إمارة بلد ( يا أبا ذر إنك ضعيف وإنها أمانة وإنها يوم القيامة خزى وندامة إلا من أخذها بحقها وأدى الذى عليه فيها) لأن الإنسان لو تولى منصب بعد ما سعى إليه وما قدرش يعدل حيكون عقابو عند ربنا شديد وللأسف الناس بتنسى أو بتتناسى الموضوع ده وزى ما انتو شايفين الكل بيسعى للمناصب واللى بيتولى منصب أو بيقعد على كرسى بيلزق فيه بمغناطيس وما بيقومش منو ولو بالطبل البلدى .
والطريقة الوحيدة عشان الحاكم يتأكد إنو عادل هى التواصل المباشر مع الناس.

اللى بيبوظ الحكام نفسهم
ولا
الشعب؟
ولا الحاشية المقربة؟
التلاتة ممكن جدا يكونو شركاء
بس أعتقد الشعب بيكون عليه عامل كبير جدا فى الموضوع , قالوا فى الأمثال يا فرعون مين فرعنك قال ملقتش حد يردنى

مين أكتر اعلامي مصري بتحترمه؟
بيعجبنى حمدى قنديل
و بحترم منى الشاذلى جدا
وبشوف إن كل مقومات الإعلامى الناجح متوفرة فيها
ثقافة واسعة فى كل المجلات ,جرأة , حيادية وموضوعية وفى نفس الوقت إحساس عالى بالناس ومشاكلهم وكأنها عايشاها مش زى بعض الإعلاميين اللى بيحسسو الناس انهم بيتعاملوا معاهم من فوق برج عالى , وأهم حاجة فيها إنى ما حسيتش أبدا إنها مساحة جوخ.

قريت ديوان عمر مصطفى صاحب بلوج تجربه(اسباب وجيهه للفرح) عن دار ملامح ولا لسه
ولو آه ايه رأيك فيه؟؟
للأسف لأ

ايه تانى بلد تتمنى تعيش في بعد مصر؟
أكيد برغم كل شئ مصر أولا
فى بيت شعر جميل جدا للمتنبى أعتقد بيقول فيه :
بلادى وإن جارت على عزيزة وأهلى و إن ضنوا على كرام
بس لو مفروض اختار بلد تانى بعد مصر فأحب تكون بلد محتلة زى فلسطين مثلا أو لبنان علشان تكون فرصتى فى الشهادة أكبر
لأن الشهادة مكانة عالية جدا يا جماعة ومش أى حد بيوصللها إلا اللى يستحقها
اللهم أحينا حياة السعداء وأمتنا ميتة الشهداء

اوصف ليا ترتيبات اجمل فرح ممكن تحضره
أهم حد فى الفرح أكيد العروسة والعريس
وأهم حاجة طبعا انهم يكونوا بيحبوا بعض ومختارين بعض ومقتنعين ببعض ولو العوامل دى توفرت أكيد حيكون الفرح يجنن .
كمان بحب أوى الأفراح اللى بتكون بسيطة لأنى مش بحب البهرجة أبدا .
ولو اتجوزوا من غير فرح أصلا أو بحفلة على الضيق يحضرها الأهل القريبين أوى يكون أحسن .

بتراعي كلام الناس والقيل والقال؟
لو اه او لو لا قول لى ليه؟
أحيانا
حسب الموقف نفسو
لو العادات والتقاليد بتتعارض مع قناعاتى الشخصية بحاول ارفضها وبحاول اصححها بس طبعا بفشل فى الآخر
وأكيد بيهمنى رأى الناس
الناس اللى بحترمهم وبثق فى رأيهم وبس .
غير كدة لأ .

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
ده أنا كنت أتجنن بجد
أعتقد لو ده حصل حتظهر عليا أعراض زى الى بتظهر على المدمنين بالظبط وهاحتاج مصحة نفسية اتعالج فيها
مش قادرة أوصفلك أيام الدراسة لما كان أهلى بيحاولوا يبعدونى عن الإنترنت كان بيحصللى ايه .

السعاده هي ؟
إحساسى إنى مش وحيدة فى الدنيا وإنى فى وسط ناس بحبهم وبيحبونى بجد ومن غير أى مصالح شخصية
إحساسى بالرضا عن نفسى وعن حياتى


عندك أمل؟؟
أسبابك؟
أكيد عندى أمل وواضح أوى من إسم اللى اخترتو لمدونتى ( بكرة أكيد أحلى)
وأسبابى إنى ما قداميش غير كدة علشان أقدر أكمل حياتى
وكمان أملى فى ربنا كبير أوى وعارفة إنو مهما اشتدت المحنة بيفرجها ولو الموضوع طول كمان بيكون خير وإبتلاء لازم نصبر عليه
فى بيت شعر بحبو جدا بيقول :
ضاقت فلما استحكمت حلقاتها فرجت وكنت أظنها لا تفرج

لما تحب تهرب من كل شئ بتروح فين؟
بروح للورقة والقلم و أحكيلهم على كل اللى فى قلبى ومش بسيبهم غير لما أقللهم كل اللى جوايا
وقتها بس برتاح وبحس إنى خلاص مبقتش محتاجة أهرب من أى حاجة .

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لما كملت 20 سنة
يومها كنت قاعدة طول اليوم كأن ماتلى ميت ههههههههه
وياويل أصحابى اللى كانوا بيتصلوا يقولولى كل سنة وانتى طيبة
والله كان هاين عليا اقفل التلفون فى وشهم
فاكرة يا سارة هههههههههههه
سارة دى يا جماعة من أعز صديقات الطفولة وهى بتدخل هنا

لما بتعمل عمل خيرى بيكون ايه هو دافعك الاول؟
أكيد إنى أرسم بسمة على وش حد
تقريبا دى أكتر لحظة بحس فيها بأهمية وجودى فى الحياة .

بتشرب سجاير؟
لو الاجابه اه ايه شعورك لو شفت ست بتشرب سجاير؟
وليه؟
مستحيل
بحمد ربنا على نعمة العقل
وبستغرب جدا من الناس اللى بيدخنوا رغم كل الأخطار المعروفة عن التدخين والحاجة اللى بجد تموت من الضحك إن كل علبه سيجار بيكون مكتوب عليها تحذير : التدخين ضار جدا بالصحة ويسبب أمراض السرطان والقلب وكأن شركات السجاير متأكدة إن الناس لاغيين عقولهم وإنهم عبيد للسيجارة برغم إنها ممكن تقتلهم .
والست عندى زى الراجل فى الموضوع ده لأنو فى كل الحالات مدمر ومفيش فرق بين الحالتين .

بتعرف ايدك اليمين من الشمال ازاي؟
سؤال صعب أوى
مفيش إختيارات؟
ممممممممممم <<<<<< ال يعنى بفكر أنا لحد دلوئتى لسه بتلخبط فيهم بس يمكن لو فى نصيب يعنى واتخطبت أقدر افرق بينهم وأعرف إن الإيد اليمين بتتلبس فيها الدبلة।

ايه اكتر اله موسيقيه بتحبها؟
بعشق العود والقانون بس للأسف مش بعرف اعزف عليهم
البيانو بقى بقدر أعزف عليه وبحب أوى أسمعو منفرد .

ايه الحاجه اللى لو حصلتلك تبقى سعيد قوى؟؟؟
لما بتوفق فى أى حاجة وأحس إن مجهودى ما راحش عالفاضى أكيد بكون سعيدة .

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
أحب أكتر يكون عندى فلوس عشان أساعد بيها الناس المحتاجة
قلبى بيتقطع من مناظر بشوفها فى الشارع
لو معايا ملايين الدنيا مش حرتاح إلا لما اخلى الناس كلها مرتاحة فى حياتها .

البحر و لا النيل؟؟؟
مفيش أروع من النيل

النيل وبلا منازع طبعا

مركب و لا طياره؟؟
بخاف من الطيارات خاصة بتاعة مصر للطيران
على رأى حمدى قنديل : سموها الشركة القابضة لأنها بتقبض أرواح الناس
أحلى وقت ممكن يمر عليا لما أكون فى مركب وسط البحر, والبحر يكون حواليا من كل إتجاه وما يكونش فيه قدامى غير البحر والسما وبس

مجنون و لا عاقل؟؟
للأسف عاقلة وعاقلة أوى كمان

تقرى كتاب و لا تتفرج عليه فيلم؟
زمان كنت بحب أقرأ وفعلا كنت بقرأ كتير
بس الآن بعد دخولى عالم الإنترنت بقيت أصلا مش لاقية وقت للكتاب
وبقيت بفضل إنى أخد الخلاصة من كل حاجة وخلاص
أعتقد الفيلم ممكن يحققلى ده .

بتمرر التاج لمين؟؟؟
لولولولولولولوليش
مش قادرة اصدق إنو خلص
عارفين لو حد بعتلى تاج تانى حعمل فيه إيه

المهم بمرروا للناس اللى كانت روفى بعتتو ليهم وطنشوا أو كانوا مكسلين زيى
بعض وجع

كفرواى
بس أنا شخصيا بقى بمررو لحازم ربيع فى روح الفدا
روح الفدا
بمرروا كمان ل

بينى وبينك

الراجل ده هيجننى

mseam

أحمد المصرى

بتاع العسل

بتاع الجاز

بمرروا كمان لأحمد عيسى فى لحظات
أحمد عيسى

وربنا يستر بقى ميدعوش عليا هههههههههه إحنا فرمضان والدعوة مجابة
وبمرروا كمان لأى حد يحب ياخدوا
أى حد نفسو فيه يا جماعة ياخدو ميتكسفش .