سيجمعنـا فجـر قريب ..

ها أنا ذا على باب السفر
أنتظر قاربي كي يبحر بي بعيدا عن واقعي
فقد قررت الرحيل
وسأخرج من أرض المعركة
أجر أذيال هزيمتي وجراحي
علي قدماي وحل وطين

لن ألتفت أبداُ للوراء
ولن أعود لما كنت فيه
فقد قالوا :
لو قررت الرحيل يوماً ... لاتلتفت للوراء
لأنك حتماً ........ ســـتعود
وأنا لا أريد أنا أعود

سأتحدي تلك النفس البشرية الوضيعة
وسأكبح جماحها
وسأحكم لجامها
سأرحل
ولن أعود
إلا وأنا أفضل حالاً
وأروق بالاً
سأترك خلفي
بصماتي
وحروفي
وكلماتي
وذكريات رائعة محفورة فى ذاكرتي حتي الممات
حتما سأعود
فانتظروني
ولا تنسوا صديقة مرت على محطات أيامكم يوماً ما
وغادرتها على استحياء
أحبائي
لقد أتي قارب الرحيل
سأشتاق إليكم
وإلي اللقاء فى فجر قريب

القبــــــــــــــو ...

يقولون يا سيدي , أن للحب مرآة عمياء , إن نظرت إليها لن تري سوي أوهام وهلام
خطيئتي الكبيرة أنني استسلمت لتلك المرآة اللعينة ,وصدقت أكاذيبها , وعشت أوهامها
فمن خلالها وجدتك , من خلالها رأيتك , من خلالها عشقتك
لكنني فى آخر المطاف , عدت كما كنت , وحيدة , شريدة
لم أحصد سوي دخان وسراب
على كاهلي أحمل مرآتي العتيقة , وبقايا من بقاياي.
ها هي المرآة لازالت أمامي
لازال محفور عليها كلامي
لازالت تذكرني بذاك الغرام , وتدفعني للثأر للإنتقام ,
لازلت أذكر
هنا كان شوق , هنا كان عشق
هنا كان شوك وهنا كان ورد
هنا كان دفء وهنا كان برد
هنا مات قلب , هنا ضاع حب
عذراً يا سيدي إن أسميته حب
قل لي , ماذا نسميه إذن؟؟؟؟
نسميه فُجر؟ نسميه عُهر؟
نسميه موت؟ نسميه قبر؟
ساقطةٌ أنا
حين منحتُك مهجة روحي
حين ظننتُ بأنك بلسم كلٍ الجروح
حين تصورتك عالياً كشأنٍ الصروح
واهمةٌ أنا
حين خضعتُ لذاكَ الهوان
فكيفَ تقامُ علاقةَ حبٍ بين اليمامةِ والأفعوان
وكيفَ ستُمضَي معاهدةُ صلحٍ
بينَ المياهِ والنيران
بينَ الهاربِ والسجان
خطيئتي الكبيرة
أنني دَنوتُ من جحرِِ الثعبان
خطيئتي أنني وثقتُ بفحيحِ أُفعوان

حين دعاني لقبوه المظلم
ذهبت وهناك , شعرت به يتسلل علي روحي , على جسدي
يطوقني , يمزقني , ويخنقني ,
وقبل أن تفارق الروح جسدي بلحظات , شعرتُ به يحررني من قبضته اللعينة

منتشيًا ضاحكاً وانزوي بعيداً , فى عمق ذاك القبو , فى الظلام
مضي هو وتركني , عارية ألملم شتات روحي المبعثرة
أترنح من هولِِ الصدمة لا من هول الألم , آخذاً معه برائتى ونقائي , وثقتي بكل شئ.
مضي وتركني , منهكة القوي أنا , جسدي يقطر دماً , روحي تقطر دماً , عيناي شاردتان فمي فاغراً
لكنني لازلتُ أتنفس
لازال قلبي الجريح نابضاً , متحدياً
زحفتُ علي أطرافيَ الدامية
خرجتُ من ذاك القبو , حيثُ الشمس والنور والضياء
حاولتُ النهوض , ولكن
قامتي مكسورة
هامتي مبتورة
وفى ظهري طعنات
حاوت مراراً ومراراً لكنني لم أستطيع
فاستسلمت واستلقيت هناك تحتَ لهيبِ الشمس
فلربما يطهرني ذاك اللهيب من هذا النَجَس , من هذا الدَنَس ,
مكثتُ طويلاً حتي التأمت قامتي , وبرأت هامتي
وشعرتُ بتحرري من ذاكَ الواقع المريع
نهضتُ مسرورة
فهاهي قامتي لم تعد مكسورة , وهاهي هامتي لم تعد مبتورة
نظرتُ حولي فوجدتُ مرأتي العتيقة لازالت معي
لم تكد البسمة تسكن شفتاي
حتي شعرتُ بذات الألم يغزو روحي ويمزق أوصالي من جديد ,
نظرتُ فى المرآة , فوجدتُ فى ظهري خنجرا
لازال فى ظهري ذات الخنجر , ولازالت فى روحي طعنات
طعناتٌ لم تبرأ ولن تبرأ
لأن من طعنني
هو شخصٌ ما ... كنت أسميه يوما

حبيبي
======================
ألف شكر للناس اللى سألوا عني
ظروفي كانت ملخبطة جدا
مش بس كدة
يوم السبت اللى فات عملت عملية فى اللثة وخلعت ضرس العقل
وما أدراك ما ضرس العقل
عملولي 3 غرز مرة واحدة
ورايحة بكرة إن شاء الله أفك الغرز
بإذن الله أول ما أرجع أزور الكل
اعزروا تقصيري

رثـــــــاء قلــــــم ...

كلما ضاقت بي الدنيا - وما أكثرها تلك اللحظات - لا أفعل سوي شيئ واحد , أتوجه إلي مكتبي وأفتح أحد أدراجي وأخرج منه القليل من الورق , وقلمي الرصاص الذي يرافقني منذ سنوات طويلة , فليس هناك فى هذا الكون من بإمكانه أخراجي من حالات الكآبة التي تنتابني من حين لآخر سواه , أحتضنه بأصابعي أحدثه , أحاوره , أشكو له أى شئ وكل شئ , برفقته أجدني أنسي الدنيا وما فيها , ولا أتذكر سوي ذاك الشعور الرائع الذي يغمرني وقتها وأنا بصحبته أفضفض له عما في قلبي , واختلاجات نفسي , وكأنني فى جلسة مع طبيب نفسي ماهر , يسمعني باسما متأملا , صاغيا تماما لكل ما أقول , كم هي رائعة جلسة المصارحة تلك , وكأنها حوار مع النفس أو واحة هادئة أستريح فيها كلما أثقلتني هموم الحياة .
اليوم , انتابني ذاك الشعور ,كالعادة ذهبت إلي مكتبي , أخرجت الأوراق , ولكن......؟
أين قلمي الرصاص؟
أين رفيق عمري؟
أين كاتب خواطري ومذكراتي وتفاهاتي؟
عبثا بحثت عنه , لم أجده فى مكانه ولا في أى مكان , لقد اختفي تماما وكأن مساً من الجن قد أصابه
آآآآه يا رفيقى العزيز
تري أين أنت؟! , تذكرت أنني لم أره منذ فترة ليست بالقصيرة , تقريبا منذ آخر خاطرة كتبناها سويا ,لقد اشتقت إليه كثيرا وأعلم أنه أيضا مشتاق إلي
وأعلم أنني قسوت عليه بجفائي وابتعادي عنه طوال تلك الفترة
لكنني لم أكن أتصور يوما أنني سأفقده
لقد اعتدته واعتادته خواطري , تري ماذا سأفعل الآن؟؟؟؟؟
صمتت قليلا , تذكرت تلك المقولة القائلة بأن " الحياة لا تتوقف عند أحد" , حتي وإن كان قلمي العزيز؟
نعم
فتحت درج آخر يحتوي الكثير من الأقلام المتناثرة هنا وهناك وأخذت قلم رصاص جديد ,يشبهه قليلا اخترته كي يكون رفيقي الجديد ,علني أعتاده ويعتادني ويعوضني كما فقدته ,
هيا أيها القلم , ساعدني كما كان يفعل رفيقي القديم , فتش معي عما يدور بداخلي , هيا استخرج معي مكنونات نفسي الحائرة كي نخرجها سويا على هذه المساحة البيضاء الشاسعة ,
هيا .. هيا
تبا لك .. مابالك صامتا كصمت الموتي فى القبور؟
ما بالك باردا عاجزا عن التعبير و الشعور؟
صرخت فيه طويلا
كدت أفقد الأمل تماما , ولكن ... هاهو الرفيق الجديد , يرتعش وجلا بين أصابعي , ويكتب ويكتب ويكتب , وما إن انتهيت من الكتابة , وجدتني ووجدته , قد خططنا لمسة الوفاء هذه , لرفيق وفي ورائع طالما أسهرته وأتعبته في اخراج تلك الحماقات التي كتبتها ولازلت أكتبها .

عملوهــــا الرجالــــــة

سلام عليكم
أخباركو ايه يا جماعة ياااااارب تكونوا بخير وفى أحسن أحوالكم
عدنا بعد غياب استمر حوالى 15 يوم بسبب خارج عن إرادتي
النت كان مفصول تماما وأنا فاكرة إنو بسبب السفينة الله يباركلها اللى قطعت الكابلات الرئيسية
أتاري العطل من عندي أنا ولسه واصل انهردة من حوالي 3 ساعات بس بعد محاولات مضنية مع شركة النت علشان يحنوا عليا ويبعتولى حد يشوفو
يلا الحمد لله على كل شئ
أنا مفتقداكم جدا جدا ووحشاني مدوناتكو وتدويناتكو
مدونتى كمان وحشانى لأنى مشفتهاش من ساعتها
بشكر كل اللى سألو عني فى غيابي
=============================

والأهم بقى
ألف ومليون مبرووووووووك للعرب عموما والمصريين خصوصا
أنا مبسوطة جدا جدا برغم إني من الناس اللى ملهمش فى الكورة خالص
وكمان -بس مش عايزة تريقة من فضلكو- إحم ... متابعتش ولا ماتش غير المبارة النهائية بتاعة انهردة والحمد لله كان وشي حلو عليهم وأخدوا الكاس هههههههههههه
يا عالم لومكنتش اتفرجت كان حصل ايه
مباراة ممتعة جدا وأجمل مشهد تحديدا بتاع محمد زيدان لما كان بيحارب على الكورة واكيد كلكو شفتو اللاعب اللى قدامو كان أد ايه قوي وشده ووقعه ومسكه من راسه ورغم ده كلو قدر يمررها بالروعة دى لأبو تريكة علشان فى نصيب نسجل الهدف الوحيد فى المباراة الرهيبة دى
بصراحة برغم عدم خبرتى فى الكورة بس اعتقد إن المباراة كانت صعبة والكورة فى الشوط الأول كانت منحوسة آخر نحس وكأنها حالفة ما تدخل الشبكة
بالمناسبة ماما كانت بتؤكد لنا وبتحاول تقنعنا إن لعيبة الكاميرون اكيد كانوا ساحرين الكورة علشان متدخلش فى الجون هههههههههههههههه
يا حبيبتى يا ماما والله انك عسل
المهم مبروك علينا كلنا
وعقبال كل مرة ياااااااااارب

مطـــــــر ...

في عز الشتا آخر السنة

لما المطر ينزل علينا يبلنا
والدنيا هادية والسما مغيمة
بتمر على بالى صور قديمة معتمة
صور لبنوتة جميلة صوغننة
كانت هنا من كام سنة
===========
في عز الشتا كل سنة
لما المطر ينزل يغرق حينا
تجري على الشباك رنا
ترفع إيديها تدعى لربنا
وتقللو أحلامها البريئة المستحيلة الممكنة
أحلام بسيطة كلها حب وأمل
مفيهاش ألم مفيهاش جنون ولا شعننة
===========
وعدت سنة ورا سنة
وكبرت رنا
مبقتش بنت صوغننة
مبقيتش أحلامها بريئة وممكنة
مبقيتش عارفاها أنا
مبقيتش شايفاها أنا
نفسى أشوفك يا رنا
نفسى ألمسك نفسى أحضنك ونعود سوا علي حينا
===========
في عز الشتا من كام سنة
البنت دي كانت أنا
وأنا من يوميها كل ما بشوف المطر
بجري على الشباك وأدور فى الشوارع والبشر
يمكن أكون فيهم أنا
يمكن أشوف صورة رنا
.................................................................
تحديث
إضافة رائعة من إيهاب الشنكوتي الكبير

وفي لمعة النور على المطر
بنشوف سبع الوان تبان
الوان تنادي للي تايه من زمان
هنا الطريق
هنا المكان
ارجع في الوان السما السبعه الجنان
انا قلت ممكن تسأليه عن بنت تاهت من زمان
قلتي اسمها رنا كمان
اهي هناك واقفه بتلعب في المطر
رافعه ايديها بتدعي لربنا
قالتلها جدتها ادعي يا رنا
وقت المطر
باب السما بينفتح
وانتي كمان ادعي معاها انها
ترجع تلاقيكي هنا
تحت المطر مستنياها من زمان

انا عارف الفستان كمان غرقان مطر والبرد حامي على الأيدين المرفوعين
لكن شوية صبر يا مؤمنين
ولما ترجعلك رنا
ابقي احضنيها قوي قوي
هتلاقي جواها الدفا

وياريت كده لو تقدري
وانتي هناك بتدوري
تشوفي طفل عبيط كده
تايه كمان من كام سنه
اسمه انا

وحــــــدوووووووووه

إخوانى المدونين

أخواتى المدونات

بيان هام
حياتنا دى عبارة عن لحظات بنعيشها
لحظات حلوة ولحظات مرة , لحظات سعادة ولحظات ألم , لحظات نجاح ولحظات فشل ,لحظات لقاء ولحظات فراق
ولحظة مع لحظة = ساعة
وساعة مع ساعة = يوم
ويوم مع يوم = سنة
معلومات قيمة جدا أنا عارفة ;)
ندخل فى الموضوع بقى
عمرنا ده كلو عبارة عن شوية لحظات وأيام وسنين فوق بعض
وراكو وراكو متحاولوش
الأيام بقى فيه منها :
أيام عادية بتعدى علينا من غير حتى ما نحس ولا ناخد بالنا انها عدت
وأيام مصيرية بتمثل لنا حاجة مهمة مينفعش ننساها ولا نمر عليها مرور الكرام
والنهردة كاااااااام
انهردة 15 يناير
احفظوا التاريخ ده كويس حسألكو فيه بعد شوية
اششششششمعنى
لأنو أهم يوم فى تاريخ البشرية القديم والمعاصر وأهم يوم فى حياتى أنا شخصيا
لييييييييييييييه
علشان فى نفس ذات اليوم ده من كام سنة طلعت أنا للدنيا اللى تشرح القلب دى
أينعم هما جابونى غصب عنى لأنى مكانش ليا مزاج وكنت حالفة ميت يمين إنى مش جاية هنا نوهاااااائى
بس يلا , بعد العديد من المفاوضات والتسويات والتنازلات والاتفاقيات قررت إنى أتنازل واطلع للدنيا بقى وخلاص ,
وكلو يهون علشان مصر

ايه اللى أنا بقولو ده ههههههههههههههه
طيب طيب متزوقوش كدة
افهمونى بس
أنا بتكلم جد والله
حوضحلكو اللى بقولو ما احنا اخوات بردو مفهاش حاجة

الحكاية بقى إن مامتشى حبيبتشى وهى صغيرة كان عندها فى البيت كم قطة فتقريبا موضوع القطط ده أثر عليها , وسبحان الله كانت كل ما تحمل مبيكونش فيه نصيب والحمل مكانش بيكتمل
ست مرات الحمل ميكتملش
خدو بالكو بقى م الحتة اللى جاية دى
أنا الوحيدة
الوحيييييييييدة من ضمن الست مرات دول اللى الحمد لله الموضوع مشى للآخر وجيت..
شايفين النحس
شايفين الغلاسة
يعنى أنا بس اللى ليا نصيب أشوف الدنيا من ضمن اخواتى اللى كان مفروض يبقوا خمسة
عاااااااااااا
أوقات بقعد أفكر خاصة لما الدنيا بتضيق عليا وأقول :
اشمعنى أنا اللى جيت من ضمن اخواتى؟
ياترى ده خير ليا ولا ايه؟
هما مرتاحين ملهمش نصيب يآسوا فى الدنيا زى ما أنا بآسى , بقعد أحقد عليهم شوية
بس بعدين برجع بقول الحمد لله إنهم ارتاحوا ,
أنا بحبهم أوى برغم إنى مشفتهمش
ومعرفش كمان كانو حيبقو كام بنت ولا كام ولد
فهمتوا بقى الفلم؟
الفلم من الآخر إن انهردة عيد ميلادى
الكااااااااام بقى؟
ال 23
ياااااااااااااه 23 سنة مرت من عمرى وأنا مش دريانة
يلهوى , حاجة تخض بجد
أنا مش بحب أكبر وبترعب من فكرة إن العمر يجرى بيا كدة وأنا مش عارفة أمسكه أو أوقفه
على فكرة , أنا من الناس اللى مش بيحبوا يحتفلوا بعيد ميلادهم لسبب بسيط أوى
لأن العمر ده عامل زى النتيجة المتعلقة عالحيط
يا سلام يا سلام شايفين التشبيهات , تكونش دى اللى اسمها الإستعارة المستكنية اللى خدناها فى النحو زمان
ما علينا
العمر ده عامل زى النتيجة , كل يوم بيعدى بنقطع ورقتو ونرميها لحد ما يخلص كل الورق اللى فيها نقوم نرميها هى كمان
فيوم عيد ميلادى بقى بكون غلسة غلاسة
وكآبة الدنيا فيا وتلاقونى كدة قاعدة وحاطة إيدى على خدى كأنى قاعدة فى ميتم باخد العزا
أصحابى كمان هههههههههههه والله بيصعبوا عليا
هما كمان عارفين الحكاية دى عشان كدة بيبقوا خايفين وهم بيتصلوا بيا عشان يقولولى كل سنة وانتى طيبة
فبيكتفوا فى اليوم ده انهم يبعتو مسجات عالموبايل وايميلات وبس
أصل اللى يقللى كل سنة وانتى طيبة فى يوم زى ده ببهدلوا
مش أنا اللى يتقاللى كل سنة وانتى طيبة
فبيستنوا عليا يومين ولا حاجة عشان أكون تعايشت مع الواقع الأليم وتقبلت الصدمة بصدر رحب
وصدقت إنى فعلا كبرت سنة وبعدين يكلمونى =================================
يا معشر المدونين والمدونات
أنا بجد مبسوطة أوى إن ده أول عيد ميلاد ليا عالبلوج , ومبسوطة إنى بقيت فى وسطيكو وبقيت واحدة من المجتمع التدوينى الجميل ده , وبجد بحبكو فى الله أوى وحاسة إنكو إخواتى اللى ممكن افضفض معاهم وأشكيلهم وأشاركهم ويشاركونى لحظات عمرى سواء حلوة أو وحشة

طولت عليكو أوى ونسيت أضايفكو
لأ لأ لأ متفرحوش أوى كدة
أنا مش بتاعة تورتة وجاتوه وكلام فاضى من ده
حقوم أعملكو القهوة السادة على روح المرحوم

اللى حيجى من غير هدية يا ويلو
أنا بقلكو أهو هههههههههههه
كل سنة وانتو معايا
فى حاجة مهمة نسيت أقولها
وحدووووووووووووووووه

هيا أيتها الحياة ... إبتسمى قليلا

قررت أعيش حياتى زى ما هى

قررت أستمتع بكل لحظة وما اشيلش هم لأى حاجة
قررت أحمد ربنا على النعم الكتير اللى أنا يمكن مش حاسة بيها
قررت أتقرب لربنا أوى
قررت ما أندمش على حاجة عملتها
لأن الواحد طبيعى جدا يغلط لكن مش طبيعى يكرر الغلط
وأن ومش حيعرف ان الغلط غلط إلا اذا وقعت فيه واتعلم منه
قررت أبتسم علشان أحس بالسعادة
وما استناس إنى أحس بالسعادة الأول علشان أبتسم
قررت بعد انهردة ما انخدعش لماأشوف الأسد بيبتسم
لأن
إذا رأيت نيوب الليث بارزة
فلا تظنن أن الليث يبتسم

وعلى رأى فريد
الحياة حلوة
بس نفهمها
الحياة غنوة
ما أحلا أنغامها
ارقصوا وغنوا وانسوا همومها
دى الحياة حلوة

استفـاقـــــــــــــــــــة

يا هذا .. يا من كنت أسميه يوما حبيبي .. يا من لأجله قدمت كل شئ بلا قيود وبلا حدود ..يا من ظننته إنسان لديه قلب وشعور ..ومنحته خلاصة حبى وأشواقى ..وشعرت به من أعماق اعماقى .. يا من استطعت باحتراف أن تحيك شباكك حولى من كل الجهات .. وأنا ببلاهة اقتربت من تلك الشباك بفضول كفضول الأطفال ..وبأقدامى هذه دخلت إلى شباكك المحكمة أيها الصياد الماهر ..وأنا أظنها جنة خضراء كما صورتها لى مرارا .. وإذا بى أجدها كجهنم المحفوفة أسوارها بلأشجار والورود .. و باطنها نيران وجحيم ..
وخلف تلك الأسوار الجحيمية العالية .. وجدتك هناك ..تنظر لى نظرة انتصار وكلما استغثت بك ازددت ضراوة ووحشية ..ونسجت حولى المزيد والمزيد من حبائلك المميتة ..
يا هذا .. يا من كنت أسميه يوما حبيبى ..
اليوم واليوم فقط .. استفقت من أحلامى الوردية ..اليوم واليوم فقط تحررت من شباكك ومن قيودك الحديدية ..نعم .. لم أخرج منها كما دخلتها .. فهنا على جسدى غائرة طعناتها .. وهنا على روحى محفورة آثار سياطها ..فلقد سفكت دمائى .. ولقد مصصت رحيقى .. تماما كما يفعل العنكبوت بفريسته ..وتركتنى .. بل أنا التى تركتك أيها الأفعوان .. تركتك وأنا أترنح من هول صدمة العمر ..فلا أنت قتلتنى وأرحتنى .. ولا أنت تركتنى أعود من حيث جئت ..

يا هذا .. هل تعلم أننى وقبل تلك اللحظة لم أكن اعرف معنى كلمة (كره)؟ ولم استشعرها مطلقا طوال سنوات عمرى ال 22؟
اليوم أبشرك بأنك أول من صنع هذا السبق فى حياتى .. وكما أحببتك من أعماقى .. كرهتك من أعماق اعماقى وبكل ذرات روحى الذبيحة .. التى نحرتها بخنجر كلماتك السامات .. اليوم استئصلتك من حياتى أيها الورم الخبيث الذى غزا روحى على حين غرة..و قريبا جدا سأتعافى منك ..وسأعود أنا كما كنت.. قبل أن تلدغنى بسمومك أيها العقرب .. يا من هوايتك الأذى .. وذبح الضحايا بدم بارد بلا قلب ولا ضمير .. سأعود
أقوى .. وأفضل .. وأجمل ..
واعلم أن نيرانك برغم قسوتها ثقلتنى وزادتنى قوة وصلابة .. كصلابة الحديد .. والآن لم أعد قابلة للإنحناء أو الإنثناء أمام أى انسان
و سمومك هذه صارت فى دمى ترياقا وأكسبتنى مناعة ضد أى لدغات مقبلة ..
وداعا إلى غير رجعة ..
يا أول من علمنى كيف يكون الندم ।
====================================
بعد الكلام اللى يفتح النفس ده عايزة اقول كل سنة وانتو طيبين
وان شالله تكون سنة سعيدة على الجميع
أنا عارفة انى مقصرة أوى
ده انا حتى مرديتش على بعض الكومينتس فى البوست اللى فات
المهاجر
زيزى
رئيس جمهورية نفسى
سوووو
فرنسا هانم
شهروزة
mermaid
لسه بعقلى
مبسوطة أوى بزيارتكو خاصة اللى أول مرة بيزورونى وبيحطولى كومينت

ادعولى لأنى محتاجة دعائكم أوى